(1925) Un payo falando solo
Toi aquí porque sí, me caso en baxo, que non se me rompeu delgún bubaxo, y puedo tar aquí, si me da gana, la metá y algo más de la semana.
Traigo en bolso cevera pa chumar la xarapa que yo quiera, y a naide nin delgún emporta un pito que apañe una merluza ni un bonito. Pagando lo que tome, qué rosoño, non hai pelos pa mí, me caso en Bioño,
pos quian paga descansa según diz el refrán; y non amansa quian trai a barlovento cinco duros o diez, y más de ciento. Tá el caldo qu´escentella, así me salve Dios. Otra botella, y con ésta van siete, p´ayudar al adobo y al zoquete de pan de la Camposa que fai una merienda mui curiosa. A mí que non me digan que tomando la sidra y un taquen de cuando en cuando
que se pierd´ el sentíu de la cabeza. Lo que la sidra da ye fortaleza, firmeza nos cadriles, puxanza nos caniles, nel gañote frescura y na boca ´l estómado fartura. El que non bebe sidra non acierta que a lo qu´estamos tuerta ye a pasar esta vida sin desmayos.
Tienen que la pasar echando rayos los que nunca gozaron de la dicha de fartase de sidra po la espicha.
Valiente mentecato el que procura non apañar siquiera una fartura de sidra de la pipa, que-i faiga revuelguinos en la tripa. Yo de sidra dacuando toi n´ayunes; pero en llegando el llunes non me saca denguno de la villa sin pañar una moña de perilla,
escurro yo que non, y non m´engaño. En sin sacar la tripa de mal año tan siquiera los llunes non se puede pasar: ye tar n´ayunes. Y´el llunes, na quintana, i día prencipal de la semana. El domingo ye fiesta; pero pa char la siesta tien un que madrugar pa dir a misa, pa mudar la camisa, pa xugar al batiente y char una copuca de aguardiente. El martes, si te fartes de trabayar el martes, nin un sorbiato de xarap´aprebes,
ni el miércoles tampoco, nin el xueves.
Los viernes y los sábados n´aldea con agua de la fonte, y Dios la dea, tien que se conformar el más sediento, trabayar com´un güé, i a troche moche,
des que l´ alba amanez hasta la noche, segando pa les vaques, mayando fabaraques y diendo pal llosico a semar erga llancando los todíos na llamuerga. Así pasa un llabriego la semana en toda la quintana,
sudando la gotera col trabayo como si uno naciés pa ser mazcayo. El trabayar la tierra ye la vida del mundo, la más perra, que m´enrita la sangre y la emponzoña. En fartucándose uno de boroña, de pataques solteres y de arbeyos, aseguren los vieyos
que ya non falta nada, ni un oricio, y que si uno se quexa ye de vicio.
¡Valientes mentecatos! Tá son más animales que los xatos si descurren asina, Con esta melecina mecida con saín de les formigues, quiciavis que se curen les vexigues; pero que trabayando sin tomar el sorbín de cuando en cuando, por que el´home sospira, asina Dios me salve, ye mentira. Si non hubiese llunes tábamos devertíos en ayunes. Cuando allega esi día la miyor romería, la que yo más estimo y más destingo, ye poner la ropina del domingo, los zapatitos nuevos, comer un par de huevos en tortilla
y venir a carreres pa la villa. Y ¿quián me tuse a mí, si como agora, tengo un vaso de más que me namora?
Denguno, xuro a tal. El que presuma qu´el celebro i afuma, y que-i sobren acaso les corades, que venga por un par de cebellades. Esi que me arrespuende, y que tanto se ofiende, que se avere p´acá, que non recule, nin de migo marmule, pos juntándonos dos de cara orisca, a ver si hai otros dos…. pa char la brisca.